Ruajtja e perimeve për dimër me mënyrën e lakto-fermentimit ka qenë diçka shumë normale dhe e vetkuptueshme, dmth nuk është përdorë konzervues e as uthull për thartim. Lakto-fermentimi kryhet kur perimet rrijnë pak në kripë dhe pastaj mbulohen me ujë të kripur, nëse dëshirohet shtohet edhe ndonjë barishte si kopër, magdanoz, selino ose edhe hudër. Kripa ka për detyrë që të bëjë ndalimin e formimit të bakterieve të këqia, ederisa nuk i pengon krijimin e bakterieve të mira, laktobacilet, të zhvillohen gjatë fermentimit. Bakteriet e mira e shpërbëjnë sheqerin që e përmbajnë perimet dhe ndihmojnë në procesin e fermentimit. Këto bakterie janë anaerobe dhe prandaj enën ku do ta bëjmë këtë proces duhet ta mbyllim mirë dhe mos ta hapim deri në momentin që duam të fillojmë konsumin. Prej momentit që e hapim duhet që patjetër ta mbajmë në vend të ftohtë dhe të errët, si frigoriferi. Errësira është poashtu shumë e rëndësishme edhe gjatë kohës së fermentimit, pra përpos që duhet të jetë e mbyllur mirë, nuk guxon të ketë fare dritë aty ku e mbajmë deri sa të fermentohet.
Tjetër detaj, shumë me rëndësi, është që kurrë të mos përdorni enë të plastikës për turshi apo për çfarëdo ushqimi tjetër. Plastika është shumë e rrezikshme dhe nuk e dijmë se çka lëshon në ushqimin tonë. Gavanoza të qelqit kemi aq shumë sa që është e pakuptueshme të përdorim plastikë. E dijmë që industria ushqimore na dikton që të përdorim ushqim në mbajtëse të plastikës, por ne duhet të insistojmë së paku që ushqimin që e pregatisim në shtëpi që kurrë mos ta bëjmë në plastikë. Nëse doni të dini më shumë për problemet e plastikës keni mjaft të dhëna në internet.
Përbërësit
- 1 kg tranguj
- pak lule të koprës apo ndonjë barishte tjetër (opcionale)
- 1 – 1.5 litër ujë
- 1.5 lugë kripë të trashë
- 1 gavanoz mesatarisht i madh apo 2-3 një-litërsh
Përgaditja
- Së pari, i shpërlani mirë trangujt dhe shpërlani edhe lulet e koprës. Secilit trangull i preni fundin pak më shumë dhe fillimin më pak që të ndihmon trangujt të marrin kripën
- Merrni një gavanoz ku mendoni se mund ti zen të gjithë trangujt, nuk ka problem nëse është pak më i madh. Sigurohuni që është i pastër gavanozi
- Tani hudhni pak kripë në fund të gavanozit dhe pak lule të koprës
- Pastaj hudhni një rend të trangujve
- Hudhni pak kripë dhe pak lule kopre dhe kështu deri sa të përfundoni me trangujt dhe koprën, mbulojeni me një letër kuzhine
- E vloni ujin nëse nuk e keni të filtruar. Prisni të ftohet pak uji dhe i shtoni kripën e mbetur. Përzijeni që të shkrihet kripa mirë
- Kur të ftohet uji me kripë, ia hudhni trangujve deri sa të mbulohen mirë me ujë
- Mbulojeni prap gavanozin me letër kuzhine dhe e leni ashtu të pushojë për pak kohë që nëse ka ndonjë fluskë ajri të ketë kohë të dalë në sipërfaqe
- Tani qitni përmbi tranguj ndonjë enë qelqi apo porcelani që të siguroheni se secili trangull është nën ujë
- E mbyllni me kapak dhe e leni në një vend ku nuk ka dritë (ose e mbuloni me diçka që të mos i bie drita) dhe ku temperatura nuk është e lartë
- Duhet që ta leni kështu të pahapur dhe në terr së paku një javë deri në dy javë
- Kur ta kontrolloni pas 1-2 javë, uji i turshisë duhet të ketë grimca të bardha, kjo tregon që është bërë lakto-fermentimi dhe grimcat e bardha janë laktobacilet të cilat janë shumë të mira për lukth dhe rregullimin e florës së barkut, pra janë të shëndetshme për organizmin tonë
- Pas fermentimit e vnoni në frigorifer dhe e mbani aty deri sa të kryhet
Servimi
E servoni në vend të sallatave gjatë drekës apo edhe si meze.
Ju bëftë mirë!
Thana 