Këtë vit kemi mbjellë dy lloje të specave të djegsa, që për fat të keq :-), kanë pasë shumë sukses. Dhe ashtu si janë hahen por një spec i vogël zgjatë një javë, sidomos habanero që janë specat më të djegës në botë. Në krahasim me halapenjon, habanero është 100 herë më i djegës por, ka aromë dhe shije fantastike në salcë. Nëse jeni person që e preferon të djegsën/pikanten, ndoshta duhet të kërkoni farat e habaneros pasi që mund ti rrisni shumë lehtë edhe në ballkon, gjatë verës, dhe vetëm dy bimë do të ju mjaftojnë për tërë vitin.

Për këtë salcë unë i kam përzier me speca tjera, që poashtu janë të djegsa por janë shumë më ultë në hieraraki se sa habanero, dhe poashtu kam shtuar një hudër të pjekur që ti jepë aromë dhe ëmbëlsi. Për ti dhënë masë, pasi që specat e djegës pothuaj nuk kanë fare pulp, i kam shtuar edhe pak salcë të domates.

Këtë salcë mund ta përdorni në të gjitha gatimet që ju pëlqen ju e sidomos në gatimet aziatike.

Përbërësit (për 1 gavanoz të vogël)

  • rreth 4 habanero
  • rreth 12 feferona ose 2 specë të kuq të ëmbël nëse doni më pak djegësi
  • 1 kokë e plotë hudër
  • 1/6 lugë kripë
  • 1 lugë vaj ulliri
  • 2 lugë uthull të lehtë
  • pak arrë muskati (opcionale)
  • 1/4 lugë piper i kuq i ëmbël (opcionale)
  • 2 lugë salcë e domates e trashë e ëmbël (vetëm nëse nuk përdorni specat e ëmbla pasi duhet vetëm për masë)
  • 1/2 lugë vaj ulliri për mbulim të salcës në fund

Përgaditja

  1. I pastroni specat dhe i thani mirë me letër kuzhine, pastroni kokën e hudrës nga shtresat e jashtme dhe nga dheu dhe i qitni së bashku në një enë ku do ti pjekni pak
  2. E lëshoni furrën në 200°C dhe pasi që të ngrohet i futni specat që të piqen për afro 15- 20 minuta. Nëse ju duket që hudra nuk është pjekur mirë e lini edhe pak në furrë pasi që ti keni larguar specat dhe ta keni mbyllur temperaturën
  3. I leni që të ftohen dhe ia hiqni bishtat specave me thikë, i leni farat dhe tentoni mos ti prekni me dorë specat e djegsa (mbani dorëza nëse doni). Nëse përdorni speca të kuq të ëmbël i qëroni mirë dhe ua largoni farat
  4. I qëroni hudrat dhe i qitni të gjithë përbërësit në një enë të ngushtë dhe të gjatë. I bluani me mikser të dorës deri sa të bëhet masë kremoze
  5. Tani e qitni në një gavanoz të vogël të pastruar mirë, e rrafshoni mirë dhe ia qitni vajin e ullirit për mbrojtje. E mbyllni me kapak dhe e futni në frigorifer. Salca duhet të qëndrojë afro një muaj, nëse doni që ti zgjatni afatin e qëndrueshmërisë mund ta pasterizoni në ujë të vluar për pak kohë deri sa është në gavanoz dhe pastaj ta ftohni dhe ti hudhni vajin në sipërfaqe

Përdorimi

Këtë lloj të salcës mund ta përdorni në gjella si fasule, dhe shumë tjera klasike, nëse doni ti shtoni pak shije duke pasur kujdes për sasinë që e përdorni. Është shumë e mirë në gatimet aziatike ose edhe ti shtoni pak djegësimë ajvarit të ëmbël, picës, etj.

Ju bëftë mirë!

Lini një koment