Tash është koha e luleve të jorgovanit dhe, pasi që lulet e jorgovanit mund të hahen, unë e kisha me patjetër të provoj të gatuaj me këto lule. Nëse nuk keni lulet e juaja, prej kujtdo që i merrni, duhet të jenë nga ndonjë vend ku nuk ka pesticide dhe ndotje.

Përbërësit (për 9 copë)

  • 1.5 gota miell (gota 250 ml)
  • 1/4 lugë pluhur për fryerje të brumit
  • 1/6 lugë sodë bikarboni
  • 2 lugë sheqer
  • kripë në maje të gishtit
  • 1 qese sheqer vanile ose farat e një vanileje apo 1 lugë e vogël e esencës së vaniles
  • 85 gr gjalpë/puter
  • 1/2 gotë kos/jogurt
  • 1/2 gotë vetëm lulet e jorgovanit

Përgaditja

  1. Së pari i bëni gati lulet. I shkundni mirë, mos i shpërlani. I ndani lulet e vogla duke u kujdesur që të mos mbetet pjesa e gjelbër dhe e mbushni gjysëm gote me lule
  2. E lëshoni furrën në 220°C. E bëni gati rrjetën e furrës duke ia qitë letrën për pjekje dyfish
  3. Në një enë ovale e qitni miellin, pluhurin fryrës, sodën bikarbone, kripën, sheqerin, vanilen (nëse është e thatë përndryshe e shton në fund) dhe puterin/gjalpin e ftohtë të prerë në copa të vogla
  4. Me duar e përzieni duke e shtypur puterin/gjalpën që të përzihet me miell mirë. E bëni këtë deri sa mielli të duket si miell misri
  5. I shtoni lulet e jorgovanit dhe i përzieni
  6. Tani i shtoni nga pak kosin/jogurtin dhe e përzieni me një lugë deri sa të bëhet masë e ngjitshme. Mos e shtoni komplet kosin nëse nuk ka nevojë
  7. Mos e përzieni shumë vetëm deri sa të bashkohet
  8. Hapni pak miell në sipërfaqe dhe me dorë shumë shpejtë i jepni formë të drejtkëndëshit (ose rrumbullakët, si të ju pëlqen). Mos e ngjeshni pasi ky brum nuk kërkon fare të ngjeshet
  9. E preni me thikë në trekëndësh apo katrorë ose rathë. Nëse e bëni në rrathë me gotë, ose formë tjetër, e bëni rrethin e gotës me miell, e shtypni në brumë dhe e tërhiqni lart, mos e sillni
  10. E qitni në letër për pjekje
  11. I pjekni afro 20 minuta, deri sa të skuqen
  12. I nxjerrni nga furra dhe i mbështjellni me një pecetë

Servimi

I servoni menjëherë me reçel, mazë të njomë ose puter/gjalpë apo me kremë limoni. Mund ti shoqëroni me çaj, kafe apo tamël/qumësht.

Ju bëftë mirë!

Lini një koment