Prej recetës “Jufkali Sebze”, e kam nda mishin e gjoksit të pulës dhe e kam marinuar gjatë natës që të zbutet, pasi që është pulë e fshatit, që ta përdori në këri.
Si zbutës të mishit mund të përdorni xhenxhefilin, lëngun e kivit apo mango. Unë këtë herë kam përdorë pjesën e mbetur të mangos, rreth farës që zakonisht hudhet, dhe pak xhenxhefil e pak vaj ulliri.
Përbërësit (për afro 4 persona)
- 1 gjoks i pulës, mishi i bardhë (nëse është i fermës nuk ka nevojë të marinohet, përndryshe e coptoni dhe marinoni së paku 2 orë me xhenxhefil të gërryer dhe pak lëng të kivit pa fara apo pak mango dhe pak vaj ulliri)
- 1 qepë mesatare
- 1 karrotë
- 2 thelpinj hudër
- pak xhenxhefil, nëse nuk e keni marinuar pulën, përndryshe nuk ka nevojë
- 130 gr thjerrëza të verdha apo të kuqe
- 230 gr spinaq i ngrirë ose 500 gr i freskët
- 400 ml tamël/qumësht kokosi me yndyrë të plotë
- 1.5 lugë këri pluhur
- 1 lugë piper i kuq (spec i ëmbël)
- pak piper i kuq i djegës (opcionale)
- 1/6 lugë piper i zi
- 3 lugë salcë të domates
- 2-3 lugë vaj ulliri
- oriz basmati i zier ose petë për servim
Përgaditja
- E copëtoni mishin e bardhë, nëse nuk e keni të marinuar. Nëse e keni të marinuar në frigorifer, e nxjerrni nga frigoriferi
- E coptoni qepën, hudrën dhe xhenxhefilin (nëse nuk e keni pasë në mishin e pulës)
- E pastroni karrotën dhe e preni në fletëza të holla me thikë mandolinë
- I shpërlani mirë lentet dhe i leni pak të ulen në ujë, afro 10 minuta. E kulloni mirë
- E pastroni spinaqin nëse nuk e keni të ngrirë dhe e kulloni. E coptoni trashë
- Në një enë të thellë, që ka kapakun e vet, në temperaturë mesatarisht të lartë, shtoni vajin dhe qepët
- I fërgoni deri sa të skuqen pak qepët. I shtoni karrotën dhe e fërgoni deri sa të zbutet pak karrota
- I shtoni hudrën dhe xhenxhefilin (nëse e përdorni) dhe e fërgoni shumë pak
- I shtoni të gjitha mëlmesat dhe i fërgoni pak të marrin aromë
- E shtoni mishin dhe e fërgoni deri sa i ndryshon ngjyra. E shtoni salcën e domateve dhe e përzieni mirë
- I shtoni thjerrëzat dhe tamlin/qumështin e kokosit dhe 1/2 gote ujë
- E përzieni mirë dhe e mbuloni me kapak. E leni të zihet në temperaturë mesatare, 15 minuta
- I shtoni spinaqin dhe kripën. E përzieni pak që të fundoset spinaqi dhe e mbuloni prapë me kapak, e zieni edhe për 15-20 minuta
- Nëse doni të trashet më shumë lëngu e leni edhe 15 minuta shtesë por keni kujdes që mos të ngjitet në fund
Servimi
E servoni menjëherë me pak oriz basmati, apo me peta, ose thjeshtë me bukë. Këri edhe të nesërmen është shumë i mirë. Mund ta mbani në frigorifer deri në dy ditë.
Ju bëftë mirë!
Thana 