Pasi që mielli khorasan është i përafërt me miellin durum, dhe pasi që këto ditë të karantinës është gati i vetmi lloj i miellit bio që mund ta gjej në Conad, vendosa ta provoj në pasta. Brumi nuk kishte problem gjatë ngjeshjes, por pas pushimit ishte i lëshuar shumë. Prandaj mendoj se herën tjetër do ta lë të pushojë vetëm 30 minuta.
Guacat kishin shije të fortë të detit, pasi që nuk ishin nga mesdheu por nga Pacifiku, por limoni dhe vera e bardhë ndihmoi në uljen e aromës së fortë. Ju mund të përdorni karkaleca apo ndonjë lloj tjetër. Mund të përdoren edhe copa peshku apo salmoni.
Përbërësit (për afro 4 persona)
- Për pastat
- 260 gr miell khorasan Kamut® ose 00 (tip 400 – 550)
- 3 vezë mesatare
- pak kripë
- 4-6 lugë ujë për miellin khorasan pasi që kërkon pak më shumë lagështi, për miellin tjetër mund të mos ketë nevojë
- pak miell për ngjeshje dhe hapje të brumit
- Për salcën
- 200 gr guaca vongole të qëruara (të ngrira apo nga gavanozi ose fruta deti që preferoni, të ngrira)
- 3 thelpinj hudër
- 4 lugë salcë domatesh mundësisht bio
- 1 tubë magdanoz ose kopër
- pak kripë (nëse ka nevojë)
- 4-5 lugë vaj ulliri
- piper spec i djegës (opcionale)
- pak piper i zi
- 2-3 lugë lëng limoni
- 1/4 gotë verë e bardhë (opcionale)
Përgaditja
- Në një enë ovale, ose drejt në tavolinën e punës, përzieni miellin me kripë dhe vezë deri sa të bëhet brumi bashkë. Nëse është shumë i thatë, gradualisht i shtoni ujin deri sa të fitoni konsistencën. Brumi duhet të jetë pak i lagësht por jo të ngjitet së tepërmi
- E qitni në dërrasë (nëse e keni punar në enë deri tani) dhe filloni ta ngjeshni afro 5 minuta, duke shtuar shumë pak miell në sipërfaqe, deri sa vëreni se është bërë elastik dhe, kur e shtypni me një gisht,brumi të kthehet prapa
- Tani e ndani në dy pjesë të barabarta dhe e mbështillni me najllon puthitës. E futni në frigorifer për 30 minuta
- Në ndërkohë i grimconi hudrat dhe magdanozin apo koprën
- I shpërlani mirë vongolet me ujë. I leni pak në ujë për çdo rast që ti largoni ndonjë mbetje të zallit/rërës. I kulloni mirë
- E bëni gati një tenxhere të madhe duke e mbushur me ujë (rreth 3 litra ujë) dhe e vloni. Posa të marrë valë i shtoni 1 lugë kripë dhe e mbyllni temperaturën, e mbuloni me kapak që ta ruajë temperaturën
- E nxjerrni brumin nga frigoriferi. E hapni njërin kulaq dhe filloni ta hapni me holluese (ose me aparat nëse e keni). Tentoni të përdorni sa më pak miell dhe kur të jetë mjaft e hollë, por pak më e trashë se petët e pites, e preni me pjesën e prerësit apo e mbështillini dhe e preni me thikë në trashësi që ju pëlqen (afro 4mm) . I hapni dhe i bëni pak me miell që të mos ngjiten njëra me tjetrën
- Tani e hapni edhe petën tjetër dhe veproni njejtë
- Në një enë të madhe të hapur shtoni vajin e ullirit dhe posa të ngrohet pak i shtoni hudrën, piperin e djegës dhe salcën e domates. E fërgoni pak dhe i shtoni guacat me magdanozin dhe verën e bardhë
- I fërgoni afro 1 minutë dhe e ndërpreni temperaturën
- E vloni ujin dhe i qitni një grumbull të pastave. Posa dalin në sipërfaqe i qitni në salcë, veproni me pjesën tjetër dhe i qitni të gjitha në salcë duke i përzier ngadalë
- E lëshoni temperaturën dhe posa të ngrohet ia shtoni 1 gotë nga lëngu i pastave
- E përzieni me kujdes. Provoni nëse ka nevojë të shtohet kripë. E mbyllni temperaturën dhe i shtoni piperin e zi dhe lëngun e limonit
Servimi
E servoni menjëherë ashtu si janë me një gotë verë të bardhë.
Ju bëftë mirë!
Thana 