Me mungesën e miellit nga gruri, në këto ditë të pandemisë së COVID-19, unë jam duke gatuar kryesisht me miell të drithit Khorasan me emër të mbrojtur komercial Kamut®. Përse? Për shkak se është mielli i vetëm që po mund ta gjej. Gjindet në Conad, është organik, nuk po e blejnë dhe po më mbetet mua.

Mielli Khorasan është drith i vjetër, paraardhës i grurit. Ka më shumë proteina se gruri, ka shije më të ëmbël dhe bukët duken më shumë sikur simite. Gatuhet shumë lehtë dhe njejtë me miellin e grurit të bardhë.

Në këtë recetë do të përdorë më pak maja (tharm), 1 qese maja e thatë zakonisht përdoret për 500 gr miell por unë do ta përdori për 1 kg. Arsyeja është që të kursej, pasi që tani e kam të vështirë të gjej maja organike, prandaj do ta kultivoj pra të rrisë sasinë që të më mjaftojë për 1 kg. Poashtu, në fund, do ta ndaj pak nga brumi që të kem për herën tjetër, pra ta kultivoj vet tharmin (majanë).

Përbërësit (për afro 3 bukë mesatare)

  • 1 kg miell Khorasan (Kamut®)
  • 1 pako (9 gr) maja të thatë organike (jo instante)
  • 1/2 lugë sheqer
  • 1/2 lugë kripë
  • 700 – 800 ml ujë në tërësi, mundësisht i filtruar në temperaturë normale
  • pak vaj për enën ku do ta mbani brumin

Përgaditja

  1. Në të njejtën enë ku do ta gatuani më vonë brumin, e përzieni majanë (tharmin) e bukës me sheqer dhe me 1/2 gotë ujë. E futni në një vend të mbyllur, furrë psh, dhe e leni që të shtohet në volum, afro 2 – 3 orë
  2. Tani i shtoni pjesën tjetër të mbetur të miellit dhe kripën, por mos e hudhni kripën kurrsesi direkt në masën me maja, por në miell të thatë. Filloni ta përzieni dhe dalngadalë i shtoni ujin deri sa të jeni të kënaqur me konsistencën. Mund ta bëni me dorë apo me mikser por, ujin e shtoni gradualisht duke përcjellë që brumi mos të bëhet tepër i lagësht apo ndoshta edhe të shtoni ujë nëse ka nevojë. Mielli Khorasan zakonisht kërkon pak më shumë ujë se sa mielli i grurit
  3. E ngjeshni në dërrasë, nëse doni, apo brenda në enë ose me mikser. Nuk ka nevojë të ngjeshet shumë pasi që mielli Khorasan ka elasticitet dhe bëhet shpejtë
  4. E lyeni enën, ku do ta mbani, me pak vaj dhe e qitni brumin. E mbuloni me ndonjë pecetë të lagësht dhe me një kapak (apo vetëm me kapak) dhe e futni në një vend ku nuk ka rrymim të ajrit. Unë e mbaj në furrë. E leni të vijë brumi për së paku 2 orë
  5. Pasi që të dyfishohet brumi, e ngjeshni pak që të shfryhet dhe me pak miell, në sipërfaqen ku do ta punoni, e ndani në 3 pjesë të barabarta. E ndani gjithashtu një copë brum në madhësi të një veze dhe e mbani anash për krijim të tharmit tjetër për herën tjetër
  6. E ngjeshni nga pak secilën pjesë dhe ia jepni formën që dëshironi. Unë i bëj pak si të zgjatura që të prehen më lehtë pastaj
  7. I qitni në një tepsi të lyer me pak vaj ose puter/gjalp.I mbuloni me një pecetë dhe i futni prap në furrë apo ndonjë vend tjetër të mbyllur
  8. E leni të pushojë për 30 minuta apo deri sa e vëreni që është rritur brumi
  9. E nxeni furrën në 240°C
  10. Tani i preni pak në sipërfaqe bukët, diagonalisht, që të mos ndahet korja e bukës dhe të piqet njëtrajtësisht
  11. E futni në furrë dhe e pjekni për 30 minuta. Pas 30 minutash e mbyllni temperaturën, e hapni pak derën dhe e mbyllni prap
  12. E leni bukën edhe 5-10 minuta
  13. Buka është e pjekur në momentin që skuqet dhe, kur e rrehni pak, duket thuase është e zbraztë brenda
  14. E largoni dhe mbështjellni me peceta të pastra dhe e leni të pushojë së paku 15- 30 minuta

Servimi

Buka me miell Khorasan ka shije fantastike me çkado që ta servoni sidomos me djathë pasi që ka shije të simiteve.

Ju bëftë mirë!

Lini një koment