Na ndodhë shpesh që e bëjmë recetën në përpikmëri por diçka në shije nuk na duket si duhet apo edhe nuk fryhet gjatë pjekjes e prandaj na shkon mundi kot :-(. P.sh. receta thot që të përdoret sodë e bukës (bikarboni) por nuk tregon llojin e kakaos. Çka ka kjo lidhje?

Ka dy tipe të kakaos: Neutrale apo e përpunuar & Acidike apo natyrale

Kakao neutrale apo e alkalizuar, në shumë receta anglo/amerikane njihet me emrin Dutch Processed, e që në të vërtetë do të thotë që iu ka larguar aciditeti gjatë përpunimit, pasi që kakao natyrale është në realitet acidike. Kjo bëhet duke e trajtuar me karbonat kaliumi, ose siç do ta hasni në gjuhë të huaja, karbonat potasiumi – potassium carbonate. Ky lloj i kakaos më së miri vepron me pluhur për pjekurina, e jo me sodë buke/bikarboni, nëse në recetë nuk ka ndonjë përbërës që ofron thartinë. Soda e bikarbonit duhet patjetër të ketë thartinë që të reagojë para dhe gjatë pjekjes.

Kakao acidike apo natyrale nuk trajtohet dhe prandaj e përmbanë aciditetin e vet natyral e që është më e përshtatshme për gatim me sodë bikarboni/buke. Mund të përdoret edhe pluhuri për pastë por gjithsesi soda e bukës/bikarbonit do të jep rezultate më të mira.

Si ti dalloni? Gjithmonë e lexoni përbërjen prapa nëse është e shkruar a është e trajtuar me karbonat kaliumi – potassium carbonate apo nëse shkruan që e ka aciditetin neutral apo të korrektuar. Zakonisht kakao neutrale është me ngjyrë më të mbyllët në të errët, edhe pse ndonjëherë jo, varësisht prej prodhuesit, dhe e ka shijen më të butë pra më pak të idhët/hidhur. Unë personalisht e preferoj këtë lloj më shumë.

Kakao natyrale është me ngjyrë më të qelët dhe është më e fortë në shije pra është më e idhët/hidhur. Me këtë kakao lirisht përdorni sodë buke/bikarboni.

E nëse nuk jeni të sigurtë apo prodhuesi nuk tregon për tipin e kakaos? Atëherë mund të kombinoni pak sodë të bukës/bikarboni me pluhurin për pastë që të jeni më të sigurtë që mos të ju dështon ëmbëlsira apo gatimi që bëni.

Nëse keni vetëm kakao neutrale dhe sodë bikarboni, si t’ia bëj hallit? Në këtë rast mund të shtoni pak thartirë në recetë p.sh. pak limon, apo pak kos në vend të tamlit/qumështit ose pak uthull me aromë të lehtë që të mos e ndryshon shijen. Tek recetat e njelmëta uthulla nuk do të ndikon shumë në shije, tek të ëmblat do ju duhet uthull me aromë të lehtë.

Çka nëse kam vetëm kakao acidike dhe vetëm pluhur për pastë? Nuk ka problem pasi që pluhuri për pastë ka dy veprime prandaj nuk do të jetë shumë problem, por mund ta ulni pak aciditetin në recetë, p.sh. nëse shtoni pak tamël/qumësht në vend të kosit ose nëse përdorni sheqer të bardhë në vend të kaftë.