Midhjet janë më të mirat në pranverë por edhe në shtator mund ti përdorni sidomos kur doni të plotsoni shijen e merlucit në rizoto. Merluci nuk ka aromë të veten dalluese dhe midhjet ndihmojnë të bëhet shija më e plotë. Në anën tjetër merluci në rizoto është fantastik pasi që është i butë, i shkrifët dhe përshtatet shumë me orizin dhe nuk ndjehet fare mungesa e djathit në këtë rizoto.
Rizotot zakonisht bëhen me lëngun e mishit të pulës por unë këtë herë e kam bërë me lëngun e midhjeve dhe kokave dhe bishtave të merlucit, dhe si përfundim ishte një rizoto shumë i lehtë por me plot aroma.
Për rizoto tentoni të gjeni oriz arborio, ribe, carnaroli apo roma që janë oriz i rrumbullakët. Por mundeni edhe oriz tjetër me të cilin jeni mësuar, me rëndësi është që të jetë kokërrshkurtë dhe i plotë. Rizoto duhet të jetë i lëngshëm, jo i thatë, por lëngu duhet të jetë i trashur. Orizi nuk duhet të jetë i zier tepër, duhet të jetë i zier por jo i shpërbërë.
Përbërësit (për 4 veta)
- 600 – 700 gr midhje në guacë
- 2 lugë vaj ulliri, 2 thelpinj hudër, 6 copë të vogla limon, 2-3 gjethe dafine, pak piper i zi (për sote të guacave)
- 1 merluc i madh ose tre të vegjël
- 1.5 litra ujë për supë
- 1 karrotë
- 1/2 lugë kripë
- 1 gotë (250 ml) oriz i tipit arborio, ribe, carnaroli apo roma (kokërrshkurtë)
- 1 qepë mesatare
- 2 thelpinj hudër
- 1/2 gotë verë e bardhë ose roze
- 2 lugë vaj ulliri për përzhitje
- 30 gr puter/gjalpë (për fund)
- lëngu i 1/2 limoni
- piper i zi, magdanoz ose kopër e freskët
Përgaditja
- I shpërlani midhjet me ujë dhe i kulloni. I hudhni të gjitha ato që janë të thyera ose të hapura dhe që nuk mbyllen kur i rrahni lehtas
- I grimconi dy thelpinj të hudrës dhe i qitni në një tenxhere të thellë. I shtoni vajin, gjethet e dafinës, piperin e zi dhe e qitni në zjarrë. Posa të ngrohet pak i hudhni midhjet së bashku me copat e limonit dhe i mbyllni me kapak. E lëvizni tenxheren herë pas here dhe pas 2 minutave e hapni dhe e përzieni njëherë. Nëse janë hapur midhjet, e ndërpreni temperaturën; nëse nuk janë hapur të gjitha i leni edhe 1-2 minuta deri sa hapen. I largoni nga zjarri dhe me një lugë me vrima i largoni midhjet dhe e mbani lëngun në tenxhere. Copat e limonit i hudhni
- Pastroni merlucin dhe e thani me letër kuzhine, i preni kokën dhe bishtin dhe e ndani mishin nga halat/kockat. I vendosni kokat, bishtin dhe halat në lëngun e midhjeve dhe ia shtoni 1.5 litra ujë. E shtoni karrotën në petë të holla që të zihet më shpejtë dhe ia shtoni kripën. E vendosni në zjarrë që të zihet. Posa të marrë valë e ulni tempraturën pak dhe e zieni për 15-20 minuta
- Deri sa zihet lëngu i supës, i pastroni midhjet nga guaca, i hudhni ato që nuk hapen. E coptoni mishin e merlucit duke i larguar halat eventuale. I mbani së bashku për më vonë
- E preni qepën dhe grimconi hudrën
- E pastroni orizin me disa ujë dhe e leni të kullohet
- Në një fërtere të thellë e qitni vajin dhe filloni ti përzhitni qepët, posa që të ndjehet aroma i shtoni hudrat dhe pas pak e shtoni edhe orizin
- Në ndërkohë e kulloni lëngun e supës dhe e mbani afër
- Posa që vëreni që orizi ka filluar të thithë vajin dhe fillon të bëhet pak i tejdukshëm ia shtoni verën duke e përzier deri sa të avullohet
- Tani i shtoni dy lugë të mëdha supe dhe e leni të zihet duke e përzier. Kështu vazhdoni duke shtuar lëngun dhe duke e lënë që orizi të thithë lëngun, pra i shtoni ujin gradualisht dhe duke e përzier vazhdimisht deri sa fillon të zbutet orizi. Në momentin që ju duket se ka filluar të zbutet orizi, por mesin e ka ende pak të fortë në kafshim por që kafshohet, i shtoni peshkun, e përzieni pak deri sa të zbardhet (1 minut) dhe pas kësaj i shtoni edhe midhjet. I përzieni dhe i shtoni edhe pak lëng (lëngun e fundit), e ndërpreni temperaturën, e provoni nëse ka nevojë për më shumë kripë dhe i shtoni nëse ka nevojë. I shtoni puterin/gjalpin edhe e mbuloni me kapak
- E leni 5 minuta të rrijë e mbuluar, ia shtoni lëngun e limonit dhe e perzieni
- I shtoni pak piper të zi, magdanoz ose kopër para se ta servoni
Servimi
E servoni menjëherë si drekë apo darkë me sallatë. Në fund mund ti shtoni edhe magdanoz të grimcuar
Ju bëftë mirë!
Thana 