Fërgesat të stilit aziatik, sidomos tajlandez, janë të mira se bëhen shpejtë dhe perimet nuk zihen tej mase prandaj është gati si të hash një sallatë të ngrohtë që është shumë e shëndetshme por edhe njëkohësisht shumë e shijshme. “Stir” do të thotë “të përziesh” dhe “fry” është fërgim, rrjedhimisht është “fërgim me përzierje”. Ajo çka e bën dallimin është përdorimi i salcave si ajo e sojës, salca mizo, salcat e djegësa dhe të ëmbla por edhe farat e susamit apo tahini (pasta e susamit), kikiriki, etj. Si rregull përdoret këpurdha nëse nuk keni ndonjë mish dhe kjo e bën shumë të mirë për vegjetarianët. Në vend të bukës përdoret orizi ose pastat. Kur përdoren pastat zakonisht përzihen së bashku me fërgesën që të marrin shije derisa orizi shtohet në pjatë kur servohet, por ka edhe specialitet “stir fry” me oriz.
Si çdo përgatitje aziatike, gjithmonë kërkohet që përbërësit të pastrohen dhe të grimcohen dhe të afrohen afër zjarrit ku do ti fërgoni pasi që fërgimi zgjatë 5-10 minuta maksimum. Poashtu edhe pastat ose orizi duhet të bëhen gjatë fazës kur i grimconi apo preni përbërësit që ti keni të gatshme para se të filloni me fërgesën.
Baza janë qepa, hudra, xhenxhefili, speci pikant (sipas dëshirës), salcat që i përmenda më lartë, këpurdhat, sidomos nëse kemi shiitake, ose mishi (apo të dyjat bashkë), perime të ndryshme si karrota, speca, bizele apo fasule në bishtajë, lakra gjethore por edhe sallatë e gjelbër nëse nuk keni ndonjë lloj të lakrës. Në vend të mishit mund të përdorni edhe karkalecë deti apo copa të peshkut ose guaca.
Përbërësit (për 3 veta)
- 250 gr pasta që preferoni (por pa vezë), si shpageta, linguine apo tagliatele të holla
- 1.5 litër ujë dhe 1 lugë kripë për zierje të pastave
- 1 qepë e mesme
- 2-3 thelpinj hudër
- 1 copë xhenxhefil
- pak spec i djegës (sipas dëshirës)
- 2 speca (çfarëdo që keni por jo të kuqe)
- 2 këpurdha të mëdha apo 8-10 mesatare
- afro 20 gjethe keli apo 200 gr spinaq (ose çkado që keni si p.sh. bishtaja të bizeles, hitha, nena, burdullak)
- 2-3 lugë vaj ulliri
- 1 lugë tahini
- 1 lugë mizo pastë e tretur në 2 lugë ujë ose 2 lugë salcë soje
- 1 lugë salcë kumbulle ose 1 lugë uthull e lehtë
- 1/2 gotë e lëngut të pastave të ndarë
Përgaditja
- I zieni pastat në ujin me kripë sipas minutave që shkruan në paketim
- Në ndërkohë e grini qepën në gjysëmrrathë
- Grimconi hudrat me xhenxhefilin së bashku dhe preni imët specin e djegës
- I preni specat në copa mesatare që të jenë të dukshme edhe pasi që të përzhiten
- Pastroni këpurdhat nga dheu duke i fshirë me letër kuzhine ose me brushë (mos i lani) dhe i preni
- I lani gjethet e kelit, apo çkado që keni, dhe i largoni bishtat e fortë. I coptoni në copa të mëdha pasi që do të zbuten. Nëse përdorni bishtajë bizele vetëm i preni për së gjati që të përzhiten më lehtë
- Në ndërkohë kontrolloni pastat, nuk duhet të jenë të tejziera por të ruajnë strukturën pasi që do të zbuten pak edhe me fërgesën. E ndani 1/2 gote lëng të pastave për fërgesën dhe i kulloni mirë. I shpërlani me ujë të ftohtë nëse frigoheni se mund të ngjithen me njëra tjetrën
- Tani e qitni vajin në një fërtere të thellë, nëse keni wok edhe më mirë, i qitni qepët dhe e lëshoni temperaturën në maksimum
- I përzhitni pak deri sa të lëshojnë aromën dhe shtoni hudrën me xhenxhefilin dhe specin e djegës, e përzieni njëherë dhe menjëherë i shtoni specat e coptuara
- I fërgoni për 30 sekonda dhe i shtoni këpurdhat
- I përzhitni këpurdhat deri sa iu ndjehet aroma dhe i shtoni gjethet apo bizelet
- I përzhitni afro 1 minutë dhe i shtoni salcat, i përzieni që salcat të shpërndahen mirë dhe tani i shtoni pastat. E ulni zjarrin, i përzieni që të marrin shijet dhe e shtoni lëngun e pastave duke ia dhënë edhe një përzierje të lehtë. E ndërpreni temperaturën dhe e leni për 2-3 minuta që përbërësit të marrin shijet
Servimi
E servoni menjëherë për drekë apo për darkë. Për këtë nuk ka nevojë asgjë tjetër anash pos ndonjë pije që e preferoni.
Ju bëftë mirë!
Thana 