Salca e kumbullave përdoret në kuzhinën kineze ngjajshëm si salcë zgare (BBQ sauce). Përshtatet shumë me mish rose/shote por edhe me mish pule. Është perfekte për mishrat e kuq të egër si mish i kaprollit, derr i egër dhe ngjajshëm. Mund të përdoret edhe në petëzat e mbushura me perime (spring rolls), karkaleca deti apo me çkado që ju pëlqen juve si shije.

Shija varet nga kumbullat që përdorni por edhe nga kombinimi i sojës, uthullës hudrës dhe xhenxhefilit. Është shije komplekse dhe që i jep jetë asaj që e pregatisni. Mund ta përdorni edhe në “stir fries” fërgesa aziatike ku përdoren shumë perime dhe mishra të kuqe dhe të rosës.

Kumbullat e mia, që i kam në kopsht, janë më shumë si gjanerika (kumbulla shahine), janë ekstremisht të tharta prandaj edhe salca ime është më e thartë, por mua më pëlqen. Mund ta bëni me çfarëdo lloj kumbullash që keni, bile mund ta bëni edhe me kajsia pasi që janë të një familje. Provojeni me një sasi të vogël dhe gradualisht e krijoni verzionin tuaj që ju përshatet më së shumti, nuk do të pendoheni 🙂

Unë për këtë recetë i kam gati kumbullat e ziera më parë me pak sheqer, por ju mund ti bëni me kumbulla të freskëta.

Përbërësit (për rreth 450 ml)

  • 450 ml pure e kumbullave (me sheqer por jo e ëmbël) ose 500 gr kumbulla të freskëta të bluara së bashku me lëvore dhe 3 lugë sheqer – sheqerin e rregulloni sipas thartinës së kumbullave që i përdorni
  • 2 thelpinj hudër mesatarë
  • 1 copë xhenxhefil
  • 2-3 lugë uthull molle të lehtë
  • lëvore e 1 limoni e gërryer imët (vetëm sipërfaqja e verdhë, pjesa e bardhë është e idhët)
  • 1-2 lugë salcë soje
  • 1 lugë mjaltë (opcionale)
  • pak piper siçuan – kinez (opcionale)
  • kumin ose arrë muskati apo ndonjë aromë tjetër që preferoni
  • fluska të specit të djegës ose spec i djegës i freskët i grimcuar mirë (sipas tolerancës që keni për të djegsën)

Përgaditja

  1. Nëse nuk keni pure të gatshme të kumbullës, e pregatisni vet duke iu larguar farat dhe duke i bluar në mikser së bashku me sheqerin
  2. E hudhni purenë e kumbullave në një enë ku do ti zieni së bashku me mëlmesat. E lëshoni në një temperaturë mesatare dhe deri sa të fillon të ngrohet i bëni gati përbërësit tjerë
  3. I grimconi hudrat me xhenxhefilin imët dhe i përzieni me uthullën, sojën, lëvoren e limonit, mjaltin (nëse doni) dhe mëlmesat që i përdorni
  4. Ia shtoni mëlmesat kumbullave dhe e ngritni temperaturën që të merr valë duke e përzier që të mos ngjitet në fund
  5. Posa të merr valë, e ulni temperaturën në mesatare dhe e përzieni herë pasher që të mos digjet fundi
  6. E zieni afro 30 minuta apo deri sa e fitoni trashësinë që ju konvenon. Mos harroni që kur të ftohet salca do të trashet ende prandaj nuk ka nevojë të jetë tejet e trashë pasi që ju duhet të jetë pak e rrjedhshme
  7. Posa të jeni të kënaqur me konsistencën, e mbyllni zjarrin dhe e qitni menjëherë të nxehtë në gavanozët e pastër
  8. E leni të ftohen të mbuluar me një letër kuzhine dhe i mbyllni me kapak vetëm kur të ftohet plotësisht
  9. I mbani në frigorifer, kjo duhet të qëndrojë së paku 3 muaj pa iu prishur shija

Përdorimi

Mund ta përdorni kur bëni pjekje të krahëve si salcë apo edhe mund ta lyeni me të gjatë procesit të pjekjes. E servoni si salcë kur keni pjekje të mishrave apo edhe me perime në zgarë. Provoni dhe eksperimentoni se si ju pëlqen më shumë.

Ju bëftë mirë!

Lini një koment