Pasi që e keni marinuar lepurin në shëllirë dhe e keni shpërlarë dhe tharë mirë në letër të kuzhinës, mund të filloni me këtë recetë. Nëse keni lepur të fermës mund ta bëni menjëherë këtë recetë duke e kapërcyer hapin me shëllirë por shija dhe butësia nuk do të jetë e njejtë.
Pasi që të keni kaluar fazën e shëllirës lepuri do të ketë marrë shijen e hudrës dhe do të ketë thithë kripën dhe uthullën, që i ndihmojnë në krijim të shijes, prandaj nuk kërkon shumë marinim mëtutje përpos pak rozmarin, vaj ullliri, pak piper i djegës dhe lëkurë limoni. Nëse nuk e keni kaluar fazën e shëllirës atëherë shtoni edhe lëngun e një limoni dhe hudër pluhur apo hudër të ndrydhur që e largoni para se të filloni me pjekjen.
Përbërësit (për 3-4 persona)
- 1 lepur deri në 1.4 kg i coptuar (i marinuar në shëllirë, i larë dhe i tharë mirë) dhe të brendshmet (koka me qafë, bishti dhe barku nuk përdoren, mund të bëni lëng supe)
- 1 grumbull rozmarin i grimcuar
- lëkura e një limoni e gërryer
- 1 lugë e vogël fluska të specit të djegës (opcionale)
- 1/2 lugë e vogël kripë
- 4 lugë vaj ulliri
- nëse nuk keni kaluar fazën në shëllirë atëherë shtoni edhe: lëngun e një limoni, 3-4 thelpinjë të hudrës së ndrydhur dhe 1 lugë e mesme kripë
Përgaditja
- I përzieni të gjithë përbërësit mirë, i qitni copat e lepurit dhe i rrotulloni deri sa të ulen mirë në marinadë. Shtoni edhe të brendshmet që të marrin shije
- E leni pak të rrijë, afro 10 minuta, 30 minuta nëse nuk e keni kaluar hapin me shëllirë
- Merrni një fërtere (nëse nuk doni ta bëni në zgarë) ku i zen komplet copat e mishit, pra të ketë hapësirë. E lëshoni të ngrohet në maksimum. Nuk ka nevojë të shtohet vaj në fërtere
- Duhet të dini: pjesët e ndryshme të lepurit kanë kohëzgjatje të ndryshme të pjekjes. Prandaj, së pari gjithmonë duhet të fillojmë me këmbët e prapme (45 minuta), pastaj të parat (30 minuta), gjoksi (25 minuta) dhe në fund kurrizi (15 minuta). Pra, filloni me dy të parat dhe pastaj i shtoni tjerat gradualisht si në zgarë ashtu edhe në fërtere
- Në fillim këmbët i leni në temperaturë të lartë deri sa të fillojnë të skuqen pak dhe e ulni temperaturën, e mbuloni pak me kapak. Tani e rrisni pak zjarrin dhe i shtoni këmbët e përparme. I skuqni pak dhe prap e ulni temperaturën dhe e mbuloni me kapak. I shtoni gjoksin dhe pas 5 minutash e shtoni edhe kurrizin. Në fund i shtoni të brendshmet në zjarrë mesatar
- E largoni mishin dhe të brendhsmet kur të piqen, dhe nëse i keni përzhitë në tavë, do të mbeten shijet më të mira në fund, prandaj e ndërpreni zjarrin dhe ia hudhni 1 gotë të vogël ujë gradualisht deri sa të ketë trashësinë që ju konvenon duke e gërryer mirë fërteren që të zbutet e gjithë masa e ngjitur. Mund t’ia hidhni lepurit për shije apo ta ngjyni me bukë kur të hani
Servimi
Lepurin e servoni menjëherë me perime anash dhe pak bukë nëse doni. Mund ta servoni me perime të stinës apo me lakra të përvluara. Unë e kam servuar me sallatë të fasuleve bishtajë që bëhet shumë shpejtë.
Ju bëftë mirë!
Thana 