Tash po afrohet stina e turshive dhe ajvarit, pasiqë specat fillojnë të skuqen e sidomos ato të djegsat. Salca e djegës është sidomos e përshtatshme për receta aziatike, si këri, por është e mirë edhe për fasule, apo edhe për gjellat me mish të bluar dhe perime të tipit të musakasë. Këtë salcë mund ta përdorni në pica pikante apo edhe me burgerë shtëpie.
Për këtë salcë që kërkon hudër, për shije më të butë unë e kam pjekë, së bashku me specat dhe domatet, një hudër komplet. Pjekja e hudrës ndihmon që të largohet ashpërsia dhe shija të bëhet e ëmbël me aromë hudre por shumë të këndshme.
Përbërësit (për 1 gavanoz mesatar)
- 4-5 speca të kuqe të ëmbla
- 4-5 domate të mesme
- 7-8 speca të djegës të kuq (madhësi të feferonave)
- 1 kokë hudër
- 1/4 lugë kripë
- 2 lugë uthull të lehtë
- pak arrë muskati (opcionale)
- pak kumin (opcionale)
- 1 +1 lugë vaj ulliri
Përgaditja
- E lëshoni furrën në temperaturë 200 – 210°C
- I lani perimet dhe i fshini me letër kuzhine
- Hudrën e qëroni pak nga gjethet e jashtme dhe ia hiqni dheun nga fundi. E shpërlani me ujë dhe e fshini me letër të kuzhinës
- I qitni në dy enë të vogla ndarazi domatet dhe specat e ëmbla. Kokën e hudrës e qitni së bashku me specat dhe i futni në furrë të piqen
- Pas 30 minutash i rrotulloni specat me mashë, me kujdes që të mos digjeni, dhe i shtoni edhe specat e djegsa që të zbuten pak, mos i leni të thahen. Nëse vëreni se mund të thahen i largoni deri sa të piqen tjerat
- Pasi që e vëreni që perimet kanë filluar të piqen, pra kur domateve dhe specave të ëmbla ka filluar të ju ngritet lëkura, i largoni nga furra dhe e mbyllni temperaturën e furrës
- I leni pak perimet që të ftohen, por jo tërësisht pasi që do të qërohen më lehtë sa janë pak të ngrohta
- Domatet i kulloni mirë nga lëngu dhe i qëroni. Specat e ëmbla i qëroni dhe iu largoni farat. Specave të djegsa iu heqni vetëm bishtat. Hudrën e qëroni, nëse është shumë eë butë mund ti shtypni thelpinj një nga një
- I hidhni të gjitha në mikser me thikë. I shtoni kripën dhe mëlmesat dhe i bluani mirë
- Në një fërtere e hudhni 1 lugë vaj dhe e shtoni masën. Në temperaturë mesatarisht të lartë e përzhitni deri sa të avullohet. Para përfundimit i shtoni uthullën dhe e zieni edhe pak deri sa të largohet ashpërsia e uthullës
- E mbyllni temperaturën dhe menjëherë, sa është ende shumë e nxehtë, e qitni në gavanoz duke u kujdesur që të mos mbetet ndonjë fluskë ajri. E rrafshoni mirë me lugë dhe e mbuloni me letër kuzhine deri sa të ftohet
- Kur të ftohet ia hudhni afro një lugë vaj ulliri që ta mbuloni sipërfaqen që ndihmon në konzervim të salcës. Nëse doni, mund ta ndani në disa gavanozë të vegjël që të jetë më praktike kur e përdorni
Si ta përdorni
E përdorni në zierjet që ju pëlqejnë apo si shtojcë sidomos kur keni dëshirë të keni një salcë të djegës gjatë drekës apo darkës. Nëse e keni në gavanoz të madh, sa herë që merrni ndonjë sasi, para se ta ktheni në frigorifer, i shtoni pak vaj në sipërfaqe nëse nuk e dini se kur do ta përdorni herën tjetër. Vaji vepron si konzervues pasi që nuk lejon ajrin dhe nuk lejon të krijohet myk.
Ju bëftë mirë!
Thana 