Në Kosovë, gjatë verës, pregatiten shumë specat me gjizë, zakonisht në qytete, derisa në katunde pregatiten speca me mazë, sidomos me mazë të freskët. Kur pregatiten me mazë nuk i shtohet diçka tjetër, mund ti shtohet një lugë miell, që të trashet, nëse maza është e hollë, por nëse maza ka qenë e kulluar mirë nga tamli/qumshti, atëherë nuk ka nevojë të shtohet asgjë tjetër.
Verzionet me gjizë mund të jenë me vezë apo me pak miell të përzhitur. Disa i shtojnë edhe hudër, edhe unë, por mund të bëhet edhe pa hudër, varet nga shija.
Përbërësit (për 2 persona)
- 6 – 7 speca të gjata
- 200 – 250 gr gjizë të freskët apo rikota
- 2 vezë
- 1 thalb hudër
- 3 lugë vaj ulliri
- pak kripë
Përgaditja
- I pastroni specat dhe i thani me letër kuzhine. Nëse doni mund ti pjekni dhe t’ua hiqni lëkurën, por unë këtë herë e kapërceva këtë hap
- Në një fërtere të thellë e hudhni vajin dhe e nxeni pak, i qitni specat që të përzhiten në temperaturë mesatare. Nëse janë te papjekura dhe të paqëruara, i mbuloni me kapak që mos të kërcejë vaji. Herë pas here i rrotulloni me kujdes që të fërgohen nga të gjitha anët
- Deri sa të fërgohen specat, e grimconi hudrën
- Në një enë të thellë e qitni gjizën, vezët, hudrën dhe pak kripë. I përzieni mirë me tel rrahës apo me pirun
- Kur të jenë përzhitur specat mirë, i largoni në një anë apo në një enë tjetër nëse doni. I shtoni pak kripë specave. Tani e shtoni gjizën në fërtere dhe e përzhitni në temperaturë mesatare deri sa të mpikset (3 – 5 minuta). I ktheni specat së bashku me gjizën. E provoni a ka kripë mjaft dhe i shtoni edhe pak nëse duhet
Servimi
E servoni me bukë, nëse doni domate anash apo sallatë. Zakonisht servohet për mëngjes por, lirisht mund të servohet edhe si drekë e lehtë apo darkë.
Ju bëftë mirë!
Thana 