Derri i egër rritet lirshëm në Kosovë dhe, pasi që nuk ka predatorë që e pakëson numrin e tyre, shtohen shumë shpejtë në numër. Pasi që është i egër, shija e mishit i ndikohet shumë prej asaj se me çka ushqehet dhe aroma e mishit do të jetë shenjë e hapësirës ku është rritur. Është mish që përmbanë shumë më pak yndyrë se sa mishi i rritur në ferma, edhe më pak se i pulës, dhe poashtu është shumë i pasur me proteina, minerale dhe vitamina. Është mish shumë i kuq dhe ka shije karakteristike që nuk mund të krahasohet me ndonjë tjetër. Është shije arrore, shumë e plotë, me plot karakter dhe përshtatet shumë me verë të kuqe të fortë, si Cabernet Sauvignon. Pjesa e filetos (rruza e shpinës) është pjesa më e butë dhe pregatitet shumë lehtë.

Mish të derrit të egër mund të gjeni në rrethin e gjuetarëve. Bleni vetëm prej atyre që kanë leje të gjuetisë dhe që i përmbahen rregullave. Fileto gjindet në pjesën e kurrizit, në pjesën qendrore në mes të dy palë brinjëve, dhe ndahet shumë lehtë, mund ta nxjerrni me duar pa thikë. Pasi që është pjesa më e butë e mishit, pregatitet ngjajshëm si fileto e viçit.

Përbërësit (për 3 persona)

  • 1 fileto e derrit të egër, i prerë në dy pjesë
  • disa degë rozmarinë, gjethet e ndara
  • pak gjethe të freskëta çaj mali veriu/Kosove (manxuranë), opcionale
  • 10 kokrra gllia/dëllinja
  • 1 lugë e vogël kripë
  • 1/4 lugë të vogël piper i zi
  • 2-3 lugë vaj ulliri
  • 1 kokë hudër e plotë
  • 250 gr këpurdha të freskëta shampinjon

Përgaditja

  1. I pastroni barishtet e freskëta dhe i grimconi me thikë. I shtypni glliat/dëllinjat që të ndjeni aromën. Ia shtoni filetos së bashku me kripën, piperin dhe vajin e ullirit
  2. E lyeni mirë fileton me përbërësit që të marinohet. E leni të rrijë afro 15 minuta që ti marrë shijet
  3. I pastroni këpurdhat me një brushë, apo i qëroni cipën e hollë të sipërme dhe i preni fundin e bishtave me thikë. Mos i lani me ujë. I preni dhe i leni gati për më vonë
  4. E pastroni kokën e hudrës pak që ti largoni dheun, mos e ndani në thelpinj. E preni për së gjëri në dy pjesë duke u kujdesur që të mos shkapërderdhet (pjesa e sipërme edhe mund të ndahet, por nuk është ndonjë problem). Mbajeni për më vonë
  5. E nxeni mirë një fërtere pa yndyrë, pasi që mishi e ka vajin e ullirit, dhe kur të nxehet e qitni mishin që të përzhitet, të dy copat
  6. E leni të skuqet mirë nga të gjitha anët, për afro 2 minuta secila anë, në zjarrë të lartë dhe para se të përfundojë i shtoni hudrat. I ktheni hudrat përmbys, pjesa e prerë poshtë, që të përzhiten pak dhe pastaj i ktheni, e ulni temperaturën në mesatare
  7. Tani e qitni mishin mbi hudra dhe e leni të marrë aromën për pak kohë
  8. Kur të jetë skuqur mishi mirë në të gjitha anët dhe të marrë pak aromën e hudrës, e largoni në një enë apo dërrasë ku do ta preni, së bashku me hudrat, dhe e mbuloni që të pushojë
  9. Në të njejtën fërtere i qitni këpurdhat që të përzhiten dhe të marrin shijet. I përzhitni në zjarrë mesatarisht të lartë derisa të fillojnë të lëshojnë lëngun e vet. I shtoni pak kripë dhe pak piper nëse ka nevojë. Pasi që të jenë zbutur dhe kanë thithur komplet shijet e mbetura nga mishi, i largoni dhe i qitni në një vend me mishin apo ndarazi

Servimi

E servoni fileton pasi që të pushojë afro 5 minuta, e preni në rriska sipas dëshirës dhe i shtoni anash këpurdhat. Si shoqërues mund të servoni ndonjë sallatë të stinës apo edhe gazpaço.

 
 
 

Ju bëftë mirë!

Lini një koment