Kohëve të fundit kam filluar të përdori pasta nga spelt (anglisht) apo farro (italisht) në vend të pastave të grurit për arësye se kanë më pak gluten dhe janë më të lehta për lukth, poashtu zihen shumë më shpejtë prandaj duhet të kemi kujdes që të mos e teprojmë me zierje se mund të bëhen lloç. Edhe kjo recetë është me pasta nga farro/spelt, por ju mund të përdorni çfarëdo paste që ju pëlqen.
Pastat nga spelti mund ti gjeni në shitoret e Meridianit në Prishtinë, të farros mund ti gjeni ndonjëherë në Conad. Në Tiranë zakonisht i gjej në BioJu ku ka shumë zgjidhje të pastave bio, të lloj-lloj drithërave dhe atyre pa drithëra, për të gjitha shijet dhe nevojat.
Kjo është recetë e lehtë dhe e shpejtë, për drekë apo darkë, kur nuk kemi shumë kohë apo kur duam të mos ngopemi së tepërmi.
Përbërësit (për 2-3 persona)
- 250 gr shpageta që i preferoni (spelt, farro ose të grurit), unë kam përdorë farro integral
- 1.5 litra ujë për zierje të pastave
- 1 lugë kripë e trashë për ujin e pastave
- 2 thelpinj hudre
- 1 tubë gjethe pazia/ceklla (apo zele, siç njifen në një pjesë të Kosovës)
- 3-4 këpurdha mesatarisht të mëdha
- 6 kaperi ose ullinj të gjelbër me shije të fortë (të Shqipërisë)
- një degë rozmarin, vetëm gjethet
- një tubë magdanoz
- piper i zi
- 3-4 lugë vaj ulliri për fërgim
- djath parmezan për servim (apo ndonjë djath tjetër që preferoni)
Përgaditja
- Së pari i pastroni dhe i preni të gjitha perimet dhe e grimconi rozmarinin dhe hudrën. Nëse përdorni ullinj në vend të kaperit, ia hiqni farat duke i shtypur me thikë dhe i grimconi pak
- Në një enë të thellë e qitni ujin dhe e leni të marrë valë. Posa të marrë valë i shtoni kripën dhe i hudhni pastat. Nëse i përdorni nga spelti/farro, keni kujdes që të mos i zieni shumë pasi që mund të zihen për tre minuta (lexojeni paketimin për minutat e saktë). Gjithmonë i leni më pak të ziera pasi që do të zihen edhe me salcën që e pregatisni (kjo vlenë për të gjitha llojet e pastave)
- Kur të zihen pastat, para se ti kulloni, ndajeni një gotë të ujit të pastave të cilin do ta përdorim për salcë
- Tani i kulloni pastat, i leni anash dhe filloni me pregatitjen e salcës
- Në një fërtere të thellë e shtoni vajin e ullirit, e ndizni temperaturën në maksimum, i qitni hudrat dhe këpurdhat menjëherë që të fërgohen. Posa të fërgohen këpurdhat, i shtoni paziat dhe posa të zbuten pak i shtoni pastat. I përzieni pak që të mbështillen mirë në vaj dhe i shtoni ujin e pastave, që e keni ndarë, gradualisht që të mos i bëjmë pastat më të buta se që kemi nevojë
- Posa vëreni që lëngu ka filluar të trashet shtoni rozmarinin, magdanozin dhe kaperit (ose ullinjtë, nëse nuk përdorni kaperi). I hudhni pak piper të zi dhe i shtoni edhe pak nga uji i pastave nëse ka nevojë (nëse duket fundi i thatë i fërteres). Përzieni pak dhe menjëherë i largoni nga zjarri. Pastave nuk ka nevojë ti shtohet kripë pasi që ka në ujin e ndarë të pastave
Servimi
E servoni menjëherë me pak parmezan apo me ndonjë djathë tjetër që ju pëlqen.
Ju bëftë mirë!
Thana 