Gjatë verës kemi perime fantastike dhe është kënaqësi të pregatisësh dreka të lehta me llo-lloj perime dhe këpurdha që të plotësojnë nevojën për proteina. “Stir fry” është stil Tajlandez dhe është i mirë pasi e ruan konsistencën e perimeve duke mos i zier por vetëm duke i përzhitur pak në vaj dhe lëngjet e tyre. Mund të pregaditet si version vegjetarian apo edhe me mish pule, fruta deti, copa peshku apo edhe copa mishi të kuq. Ktu do të kemi version vegjetarian.
Baza që përdori unë zakonisht është qepa, hudra dhe xhenxhefili dhe pastaj shtohen perimet tjera. Si rregull gati gjithnjë përdoret ndonjë lloj i këpurdhës, zakonisht shampinjon ose këpurdha të egra, përpos porçinit pasi që nuk përshtatet fare me shijen e stir fry. Nëse keni shiitake shija është edhe më autentike. Për fund gjithmonë është mirë që të kemi ndonjë lloj të lakrave apo edhe sallatë e gjelbër. Si mëlmesa dhe për kripë përdoret zakonisht salca e sojës dhe ndonjë salcë tjetër e djegës dhe nëse doni ta trashni lëngun mund të shoni edhe pak nisheste por që unë nuk e preferoj.
Me kohë mund të krijoni recetat tuaja dhe mund të bëni shumë versione duke u bazuar në atë se çka keni në shpi. Zakonisht servohet me oriz basmati aromatik, që zihet vetëm në ujë.
Përbërësit (për 2-3 persona)
- 1 gotë (2 dcl) oriz basmati aromatik
- 2 gota ujë (të njejtën gotë që e keni matë orizin)
- 2 lugë fara susami
- 1 qepë mesatare
- 2-3 thelpinj hudër
- 1 copë e vogël xhenxhefil
- 2 speca të gjata
- 1 karrotë
- 6 këpurdha të mëdha
- një grumbull lakrash të egra (laboda, nena, burdullak) ose spinaq apo pazia
- 1 tubë magadanoz
- pak specë e djegës e thatë (opcionale)
- 2-3 lugë soja salcë
- 1/2 luge salcë e djegës e ëmbël (opcionale)
- Vaj për përzhitje
Përgaditja
- Së pari e pastroni mirë orizin deri sa uji të jetë i pastër. E leni orizin në ujë 5 minuta pastaj e kulloni mirë. Në një tenxhere të vogël qitni 2 gota ujë dhe i leni të vlojnë. Posa të vlon, e qitni orizin dhe e ktheni temperaturën në minimum posa të merr valë orizi. E mbulon me kapak por e leni pak hapur që të dalë avulli. Pas 10-15 minutash e kontrolloni dhe nëse është thithur uji komplet, e mbyllni temperaturën dhe e mbuloni me kapak mirë dhe e leni të pushojë pa e përzier. E përzieni vetëm në momentin që do ta servoni
- Tani derisa pushon orizi, i shpërlani me ujë lakara, specat dhe karrotat. Këpurdhat i fshini mirë me një letër (mos i lani me ujë) apo e qëroni shtresën e jashtme. I qëroni qepën, xhenxhefilin dhe hudrat duke i shtypur me thikë që të qërohen më lehtë
- E preni qepën në segmente të holla por të mëdha. E grimconi hudrën me xhenxhefilin dhe specin e djegës. I copëtoni këpurdhat. E pastroni dhe e preni në segmente të holla karrotën. I preni specat. I preni lakrat e egra në copa jo shumë të vogla. Grimconi magdanozin
- Merrni një fërtere të thellë, ose wok, dhe së pari i pjekni pak farat e susamit duke u kujdesur që të mos digjen. Posa që fillon të ndjehet aroma i largoni dhe i leni në një enë të vogël për më vonë. I merrni salcat afër dhe të gjithë përbërësit që ti keni përreth enës ku do ti përzhisni të gjitha
- Hudhni vaj deri sa të mbulohet fundi i fërteres dhe i shtoni qepët dhe e rritni temperaturën në maksimum. Posa fillojnë të përzhiten qepët (jo të zbuten, vetëm të aromatizohen) ia shtoni hudrën me xhenxhefilin dhe specin e djegës. I përzhitni pak dhe i shtoni specat dhe karrotën. Pasi që përzhiten pak i shtoni këpurdhat. Vazhdoni ti përzhitni në zjarrë të lartë deri sa të zbuten pak dhe menjëherë ia shtojmë lakrat. E përzieni dy herë dhe posa zbuten lakrat i shtoni salcën e sojës dhe salcën e djegës. Pëërzieni edhe pak dhe i shtoni farat e susamit së bashku me magdanozin e grimcuar. E ndërpreni zjarrin
Servimi
E servoni menjëherë me oriz, dhe mbajeni salcën e sojës në tavolinë nëse ka nevojë për më shumë kripë.
Ju bëftë mirë!
Thana 