Unë gatuaj shumë shpesh bukë, nuk mund të them se jam ndonjë ekspert por nuk i frigohem gatimit. Me kohë e krijoni sigurinë në vete dhe e krijoni ndjenjën e brumit dhe mund të krijoni verzionet e juaja.
Buka shumë varet nga mielli që përdorni, nga maja e bukës, sasia e ujit, sa ngjeshet dhe si ngjeshet. Duhet të dijmë që përmasa në mes miellit dhe ujit është 1 miell : 0.6 ujë, kur e bëni bukën me miell të butë, derisa duhet pak më shumë ujë (0.65) kur bëni bukë me miell të fortë. Kur bëni bukë si pitalka apo ciabatta, që ka realisht shumë pak tul por ka shumë ajër (fluska ajri të mëdha), duhet edhe më shumë ujë deri 0.7. Uji nuk duhet të jetë i vakët, kjo është absolut një mit, vetëm nuk duhet të jetë i akullt dhe mundësisht i filtruar.
Pra varësisht prej sasisë së ujit, sa e lëmë të pushon dhe të vijë brumi, sa e ngjeshim, si e pjekim, miellin që e përdorim, ndikojnë shumë në shijen e bukës, dukjen e saj, dhe për çka është më e përshtatshme. Pitalkat p.sh. janë fantastike me qebapa, qyfte apo mish të bardhë të pulës, si ushqim i shpejtë por, edhe me rrush e djathë, apo djathë dhe domate. Derisa bukët më me shumë tul dhe sasi më të vogël të ujit janë të përshtashme si përcjellëse me gjella të ndryshme, për sendviça, të lyhen me puter/gjalpë edhe reçel për mëngjes, e shumë e shumë verzione tjera.
Nëse keni mikserin që e përzien dhe ngjesh brumin për ju do ta keni edhe më lehtë, por edhe ngjeshja e brumit, nëse nuk keni probleme me dhimbje të duarve, është kënaqësi në vete.
Pra buka dhe mënyrat e gatimit të bukëve janë të pafundme dhe çdo kulturë ka krijuar verzionet e veta që ju përshtaten. Nuk është çudi që tavolina speciale ku është gatuar buka përpara është quajt Magje dhe personi (zakonisht gruaja) që ka gatu bukën është quajt Magjetore, personi që ka bërë magji.
Përbërësit
- 500 gr miell i butë (mund të përzieni 300 gr miell gruri të zi me krunde dhe 200 gr miell 0/tip 500)
- 300 – 320 ml ujë (nuk ka nevojë të jetë i vaktë)
- 1 lugë e vogël sheqer (të kaftë mundësisht)
- 1 lugë e mesme kripë
- 7 gr maja e thatë (ose 9 gr nëse përdorni maja organike)
Përgaditja
- Në mikser me përziersen për bukë e qitni miellin e peshuar dhe i shtoni majanë e bukës së bashku me sheqerin (ose në tavolinë të punës e sitni miellin në formë kodre dhe i shtoni majan me sheqerin dhe e bënë një hapje në mes)
- Përzieni mirë në mikser së pari në të thatë miellin me majan dhe sheqerin
- Tani filloni ti shtoni ujin gradualisht duke e përzier, në mënyrë që të përcjellni nëse nuk duhet të kryhet uji apo nëse duhet të shtohet pak më shumë
- Brumi duhet të jetë i ngjitshëm por jo i lëngshëm. Nëse ju duket shumë i thatë i shtoni ngapak ujë gradualisht deri sa vëreni se ka filluar të jetë brumi më elastik
- Tani, kur jeni të kënaqur me konsistencën, e ngjeshni brumin për 1 minut me mikser. Me dorë, nëse nuk keni mikser, mund ta bëni në sipërfaqe me pak miell që të mos ngjitet ose me pak vaj. Mikserin e mbani në shpejtësi mesatare, nuk ka nevojë të rrahet shumë
- Tani ia shtoni edhe kripën dhe e ngjeshni edhe 3-4 minuta ose deri sa të ju duket se brumi është elastik dhe kur e merrni me dorë që brumi të zgjatet e jo të këputet menjëherë
- Kjo do të thotë se ka filluar gluteni të punojë dhe i jep elasticitet brumit, e kjo është ajo që duam
- Tani e lagni dorën me ujë dhe e merrni brumin pak me dorë që ta ndjeni nëse ka elasticitetin që ju pëlqen (nëse e keni ngjeshur me mikser). E lyeni me vaj një enë ku do ta mbani brumin, ose në atë ku e keni ngjeshë, e lyeni brumin nga të gjitha anët me vaj dhe e mbuloni enën me një najllon puthitës
- E leni në një vend të ngrohtë nëse doni ta gatuani të njejtën ditë, përndryshe nëse doni ta leni gjatë natës nuk ka nevojë për ndonjë vend special, mund ta mbani edhe në frigorifer nëse nuk jeni të sigurtë se kur do të zgjoheni të nesërmen
- Pasi që të jetë dyfishuar masa e brumit, (pas dy orëve ose gjatë natës) e mbledhim brumin me dorë pak të lagur dhe vetëm e mbështjellim brumin në një rrumbullak dhe e qesim në sipërfaqe me pak miell. Shumë shpejt i japim formën që duam dhe e qesim në një tepsi të lyer me puter/gjalp dhe pak miell (unë e kam ndarë në dy pjesë)
- E mbulojmë me një leckë dhe e lëmë të pushojë edhe për 30 minuta deri në një orë
- E nxejmë furrën në 220°C deri 230°C dhe para se të fusim bukën në furrë e prejmë sipërfaqen e bukës diagonalisht apo e shpojmë me një rrëmojce
- E pjekim për 30 deri 45 minuta varësisht prej fomave që i kemi dhënë bukës. Nëse nuk e kemi nda brumin atëherë nevojitet pak më shumë kohë
- Kur të piqet (kur skuqet mirë dhe është e fortë korja nëse ia mshojmë pak me gishta) e nxjerrim, e mbështjellim menjëherë me lecka të pastra dhe e lëmë të pushojë për së paku 15 minuta deri në 30 minuta para se ta servojmë
- Mos e futni në qese kur është e ngrohtë
Servimi
Buka e freskët në mëngjes është një kënaqësi absolute, me pak djathë dhe domate kur janë në sezonë, mmmmm fantastike!
Ju bëftë mirë!
Thana 