Pinxhuri është tipik për regjionin e ballkanit dhe zakonisht pregatitet në vjeshtë si rezerva të dimrit, pra si turshitë. Kjo është prej kohërave kur nuk kemi pasë frigorifer dhe ruajtja e perimeve si domatet, specat apo patëllxhani është bërë më së miri duke pregaditë ajvar apo pinxhur përpos turshive. Sot kjo nuk na ndalon që ta bëjmë edhe herave tjera kur i kemi këta përbërës. Sidomos kur keni më shumë sasi të domateve, specave dhe patëllxhanit dhe nuk dini çka të bëni me to, pasi që nuk doni që të prishen.
Pinxhuri për tu pregatitur kërkon vetëm pak më shumë kohë dhe durim. Kjo recetë është verzioni im i pinxhurit, sigurisht ka edhe verzione tjera dhe pasi që shija është subjektive secili prej nesh e ka recetën që i pëlqen.
Përbërësit
- 1 kg speca të kuqe (ose të përziera)
- 1 kg patëllxhan
- 1.5 kg domate
- 2 thelpinj hudër të mëdhenj ose 4 të vegjël
- 1 lugë e mesme kripë
- magdanoz apo gjethe selino (opcionale)
- 5-6 lugë vaj për përzhitje
Përgaditja
- Së pari i lani dhe i thani me letër kuzhine të gjitha perimet
- Patëllxhanat i ndani në mes dhe ia largoni rrëfanat
- Me pjesën e prerë poshtë, i hapni patëllxhanat mbi rrjetën e furrës dhe përfundi e leni tepsinë e furrës që të kullojë gjatë pjekjes, poashtu i shtoni edhe specat në të njejtin vend
- Në një tepsi tjetër i qitni domatet (pa rrjetë) dhe tentoni që të kenë hapësirë pasi që do të piqen më mirë
- E nxeni furrën në maksimum dhe i futni të dy tepsitë në furrë. Specat me patëllxhanat të jenë sipër e domatet përfundi
- I pjekni afro 30 minuta dhe nëse njëra anë e specave është skuqur dhe lëkura ka filluar të shkëputet nga specat, me dorëza dhe me mashë të kuzhinës, i rrotulloni një nga një me kujdes që të piqen në anën tjetër. Kjo është e nevojshme vetëm për specat
- Vazhdoni ti pjekni edhe 15 -30 minuta tjerë, apo deri sa të piqet edhe ana tjetër e specave dhe e vëreni që edhe domatet kanë lëshuar ujin dhe patëllxhani është zbutur
- Nëse patëllxhani dhe specat janë pjekur dhe ju duket që domatet kanë ende nevojë, mund ti largoni specat me patëllxhanin dhe vazhdoni ti piqni edhe pak domatet deri sa ju duket që kanë filluar të lëshojnë lëngun ose duken të pjekura
- I nxjerrni edhe domatet pasi që janë pjekur mjaft dhe i leni të ftohen
- Pasi që temperatura të jetë e durueshme, filloni ti qëroni patëllxhanat apo merrni një lugë mesatare dhe ia nxerrni mishin në tërësi dhe i hudhni në enën (fërtere të madhe) ku do ti përzhitni, nuk keni nevojë ti coptoni
- Qëroni specat dhe i largoni farat me kujdes dhe poashtu i qitni në të njejtën enë ku do ti përzhitni. I ndani në copa të mëdha apo të mesme, sido që të ju pëlqejë juve
- Tani qëroni domatet, nëse janë pjekur mirë lëkura do tju hiqet shumë lehtë. Secilën domate e shtrydhni mirë në mes të pëllëmbës dhe e qitni në fërtere bashkë me patëllxhanin dhe specat. Mund ti ndani në dyshe apo katërshe, sido që e preferoni dhe mos harroni t’ia hiqni pjesën e fortë
- Duke pastruar domatet, ato mund të lëshojnë lëng përsëri në enën ku do ti përzhitni, e këtë mund ta thithni me një letër të kuzhinës (të bardhë, pa ngjyra). Kjo do të ju ndihmon që ta përzhisni më shpejtë dhe të harxhoni më pak kohë dhe energji
- Tani i hudhni vajin e ullirit (afro 5-6 lugë) dhe hudrën pak të ndrydhur por jo të grimcuar që të mos bëhet aroma e fortë
- E hapni zjarrin në maksimum dhe filloni përzhitjen deri sa të fillojnë të ndjehen aromat, e ulni temperaturën në mesatare dhe e përzieni herë pas here që të mos digjet fundi
- I shtoni edhe kripën dhe kur ju duket se mjafton përzhitja, i shtoni edhe magdanozin apo gjethet e selinos nëse preferoni. Provojeni edhe njëherë për sasinë e kripës, shtoni nëse ka nevojë dhe e përzieni mirë
- E mbyllni zjarrin dhe, sa është ende i nxehtë pinxhuri, filloni ta hudhni në gavanozë apo ndonjë enë tjetër të qelqit që mbyllet mirë. Gavanozat duhet të jenë vetëm të pastruara mirë, dhe të thata, nuk ka nevojë të sterilizohen, pasi sasia nuk është e madhe dhe do të hahet shpejtë, përpos që do e mbani në frigorifer
- I mbuloni me letër të kuzhinës deri sa të ftohen në temperaturë të dhomës. Kur të ftohen, i shtoni një shtresë të vajit përmbi që të mbulohet me vaj, kjo e mbronë nga myku nëse nuk do ta hani shpejtë. I mbyllni me kapak dhe i futni në frigorifer. Sa herë që merrni nga gavanozi dhe nuk jeni të sigurtë se do të merrni prap së shpejti,e niveloni mirë dhe i hudhni prap një shtresë të hollë të vajit, pasi kjo e ruan.
Servimi
E servoni kurdo që ju pëlqen, me bukën dhe djathin që ju pëlqen, ose edhe pa djathë, apo edhe si pjesë përbërëse e mezes.
Ju bëftë mirë!
Thana 