Mëllenjat e vogla mund ti gjeni në Tiranë në ndonjë shitore të rrjetit Conad që janë më të furnizuar. Ose, nëse nuk keni mundësi ti bleni në Tiranë, mund të porosisni fllanza tek ndonjëri nga prodhuesit e vezëve të fllanzave në Kosovë, të cilët zakonisht i japin informatat në paketimet e vezëve të fllanzave që i shesin, nëse nuk keni ndonjë burim tjetër të furnizimit. Mëllenjat dhe fllanzat/shkurtëzat në vete nuk kanë shumë shije të dalluar prandaj është mirë që të marinohen. Nëse janë zogj pak më të mëdhenjë, mund ti preni mes-përmes me thikë që të piqen më lehtë dhe të marrin më shumë shije nga marinimi.
Kohëzgjatja e marinimit duhet të jetë së paku 30 minuta. Sa më gjatë që i marinoni aq më shumë do të marrin shije dhe mishi do të jetë më i lëngshëm. Nëse planifikoni ti marinoni më shumë se 30 minuta, patjetër i futni në frigorifer gjatë kësaj kohe dhe i nxjerrni së paku 15 minuta, para se të filloni me pjekjen, që të marrin temperaturën e dhomës. Kurrë mos i pjekni mishrat direkt nga frigoriferi. Zogjtë mund ti leni edhe gjatë natës të marinohen në frigorifer deri të nesërmen kur doni ti pjekni.
Përbërësit:
- Reth 6 mëllenja ose fllanza/shkurtëza (llogarisni 1-2 copë për person, varësisht sa keni oreks) të pastruara dhe të thara mirë me letër kuzhine që të mos kenë ujë
- 1 lugë gjelle piper i kuq
- 1/2 lugë gjelle piper i djegës (opcionale)
- 3/4 lugë gjelle kripë
- 1 lugë gjelle rigon i thatë
- 1/4 lugë gjelle piper i zi
- 1/2 lugë gjelle pluhur këri ose 1/4 pluhur turmeriku/kurkuma (opcionale)
- 1/4 lugë gjelle hudër pluhur (ose hudër e ndrydhur për aromë të cilën nuk e përdorni në pjekje)
- lëkura dhe lëngu i gjysëm limoni apo limeti (limon i gjelbër)
- 4 lugë vaj ulliri
Përgaditja
- Së pari i pastroni zogjtë mirë, i kulloni mirë në kulluese dhe në fund i thani mirë me letër kuzhine. Nëse doni mund ti preni mes për mes, unë zakonisht i mbaj të plota
- Merrni të gjithë përbërësit tjerë dhe i qitni në një enë të thellë që i zen të gjithë zogjtë dhe poashtu që mund të mbyllet me kapak (ose thjeshtë e mbuloni me qese puthitëse)
- Përzieni mirë të gjithë përbërësit dhe i zhytni zogjtë një nga një dhe në të gjitha anët që të mbështillen mirë me marinadë. E mbyllni me kapak dhe e leni të pushojë. Herë pas here e hapni (nëse e keni në frigorifer e nxjerrni nga frigoriferi) dhe e përzieni mirë edhe njëherë që të marrin marinadën më mirë (e ktheni prap në frigorifer nëse do ta leni gjatë në marinadë). Nëse e leni gjatë natës, e bëni këtë para se të shkoni të fleni dhe të nesërmen në mëngjes
- Pas 30 minutash mund të filloni me pjekjen. Nëse e keni mbajtë në frigorifer më gjatë se 30 minuta, nxirreni nga frigoriferi 15 minuta para se të filloni me pjekjen
- Një fërtere që e duron zjarrin e fortë, të thellë dhe me fund të gjërë, ku mund ti piqni të gjithë zogjtë përnjëherë, e veni mbi zjarrë të fortë dhe kur e vëreni që është nxerë mirë fërterja filloni ti qitni zogjtë një nga një
- Prisni afro 5 minuta dhe i rrotulloni secilin një nga një në anën tjetër. Edhe 5 minuta të tjerë dhe i rrotulloni prap në anën tjetër. Vazhdoni kështu disa herë deri sa e vëreni që zogjtë janë skuqur mirë
- Pas kësaj e ulni temperaturën, pak më të lartë se në minimum, dhe e mbyllni me kapak. I leni tani të piqen për afro 20 – 30 minuta, varësisht prej madhësisë së zogjve, në zjarrë të ngadaltë duke i kontrolluar herë pasë here dhe duke e lëvizur enën që të shpërndahet lëngu që e lëshojnë
- Tani e ndërpreni zjarrin dhe i leni ende ashtu të mbyllura me kapak, mos e largoni nga pllaka e zjarrit edhe 10 minuta
- Pastaj e hapni kapakun dhe i merrni me kujdes një nga një, i radhitni në pjatën që e preferoni dhe poashtu nëse ka lëng në fund të enës ia hudhni përmbi
Servimi
I servoni me perime të stinës, si shparg të përzhitur me vaj ulliri dhe marinuar me uthull balsamik, me bizele të ziera ose me sallatë patatesh apo me çkado që preferoni ju.
Ju bëftë mirë!
Thana 