Qershori është sezoni i midhjeve dhe mund ti gjeni në shitoret e peshkut edhe në Prishtinë. Midhjet janë burim i proteinave të shëndetshme, vitaminit B12, hekurit dhe i mineraleve të domosdoshme për organizëm. Kur ti bleni kërkoni nga shitësi që ti pastron për ju, pasi që pastrimi merr kohë. Duhet të keni parasysh disa gjëra që të keni soté të shijshme dhe të mos keni probleme:
- Kurrë mos i leni midhjet (apo çfarëdo guace tjetër) të mbyllura në qese dhe në frigorifer sepse ngordhin. Sapo të mbrrini në shtëpi nga shitorja, i hapni menjëherë dhe i qitni në një enë të thellë të mbushur me ujë të freskët
- Kontrolloni midhjet dhe i hudhni ato që janë të hapura dhe nuk mbyllen nëse i rrehni lehtë me dorë, kjo do të thotë se janë të ngordhura dhe nuk guxon të hahen sepse lirojnë helme. Gjithashu i hudhni edhe ato që janë të thyera
- Pasi që i keni zier dhe i shërbeni, informoni të gjithë të cilëve i shërbeni se ato midhje që nuk janë hapë, e që është e vështirë të hapen me dorë, mos i hani, i hudhni
- Pra, është shumë e rëndësishmë që midhjet të jenë të freskëta dhe gjithmonë ti bleni nga furnizuesi që keni besim
Midhjet, kur i keni të pastruara, bëhen shumë shpejtë, jo më shumë se 5 minuta. Dhe kjo recetë mund të përdoret për të gjitha llojet tjera të guacave.
Përbërësit:
- Një kilogram guaca midhje të pastruara, të shpërlara dhe të kulluara
- Një tubë barishte (magdanoz, kopër, majoran/gjethe të çajit të malit nga veriu/Kosovë) ose cilëndo që ta preferoni
- 1 thalb hudër
- gjysëm limoni i coptuar (nëse është i shtrydhur më mirë, pasi që liron më pak thartirë)
- shumë pak kripë (pasi midhjet e kanë kripën e vet)
- pak piper i zi
- 2-3 lugë gjelle verë e bardhë e lehtë (opcionale)
- 1 lugë vaj ulliri
Përgaditja
- Së pari grimconi hudrat, barishtet dhe coptoni limonin
- I shpërlani midhjet dhe i kulloni mirë pasi që do të lëshojnë lëngun e vet kur zihen, prandaj nuk ju duhet fare ujë
- Në një tenxhere me kapak, që e ka bazën e gjërë, i hudhni hudrat e grimcuara, kripën, piperin, verën dhe vajin e ullirit
- Tani e qitni mbi pllakën e nxehur në temperaturë maksimale dhe menjëherë si të fillon pak të ngrohet i hudhni midhjet së bashku me copat e limonit
- E mbyllni me kapak dhe e lëvizni enën e mbyllur me dorë ndonjë herë deri sa të vëreni që kapaku i tenxherës është i nxehtë
- Hapeni kapakun dhe me një lugë të madhe i përzieni prej poshtë lartë, e mbuloni edhe 30 sekonda dhe e hapni prap. I përzieni edhe njëherë dhe si të vëreni që të gjitha në përgjithësi janë të hapura, mbylleni temperaturën dhe largoni midhjet nga zjarri. I gjithë procesi nuk duhet të zgjasë më shumë se 4-5 minuta
- I zbrazni në një enë të thellë së bashku me lëngun që kanë lëshuar
Servimi:
I servoni menjëherë sa janë të nxehta me bukë të thekur apo me ndonjë bukë që është e pjekur mirë që e thithë lëngun. Bukën e ngjyni në lëngun që e kanë lëshuar. Gjithmonë mbani afër ndonjë enë të thellë kur e servoni për mbetjet.
Ju bëftë mirë!
Thana 